ஏன் மதக்கலவரம் நடத்திய மத,சாதிய பெரும்பான்மைவாதிகளுக்கு தூக்குத்தண்டனை அளிக்கப்படவில்லை என நண்பர்கள் சிலர் கேட்கிறார்கள். ஏன் யாகூப்பும் கலவரக்காரர்களும் ஒரே தட்டில் வைத்து பார்க்கப்படுவதில்லை?
இரண்டு விசயங்கள்
1) பாகிஸ்தான் துணையோடு நடத்தப்பட்ட மும்பை வெடிகுண்டு தாக்குதல் தேசத்திற்கு எதிரான போராக கருதப்படுகிறது. இது போன்ற குற்றங்களுக்கு நீதிமன்றம் தூக்குத்தண்டனை அளிக்க தலைப்படுகிறது. ஆனால் மதக்கலவரங்களை நடத்துபவர்களை இதே போல் நடத்துவதில்லை. நாம் எதிர்காலத்தில் மதக்கலவரக்காரர்களை தேசத்துரோகிகளாய் கருதும் சட்டம் ஒன்றை கொண்டு வர முயலலாம். அப்போது நீங்கள் கேட்கும் நியாயமான கேள்விக்கு விடை கிடைக்கும்.
2) சீக்கியர்களை கொன்ற காங்கிரஸுக்கும் இஸ்லாமியரைக் கொன்ற பா.ஜ.கவுக்கு மக்கள் ஏன் திரும்பத் திரும்ப ஓட்டளித்தனர்? என்னைப் பொறுத்தவரையில் இத்தேர்தலில் பா.ஜ.கவுக்கு ஓட்டளித்தவர்கள் ஒவ்வொருவரும் குஜராத் படுகொலைகளுக்கு பொறுப்பு தான். இக்கோணத்தில் யோசிக்க ஏன் தயங்குகிறீர்கள்? ஏன் கட்சிகளையும் தலைவர்களையும் சாடி விட்டு திருப்தியாகிறோம்? ஓட்டளித்த மக்களை என்ன செய்வது? ஆக இது நம் ஜனநாயகத்தின் பிரச்சனையும் தான். இந்திய சட்டங்களை உருவாக்கியவர்கள் இச்சிக்கல்களை கருத்தில் கொள்ளவில்லை. அடுத்த தேர்தலில் எல்லாருக்கும் வாய்ப்புள்ளது. அதை பயன்படுத்தி மக்களே தண்டனை அளிக்கலாமே? ஏன் செய்ய மறுக்கிறார்கள்? இந்தியாவின் பெருவாரியான குடிமகன்களின் அடிமனதில் சிறுபான்மையினர் மேல் கடுமையான வெறுப்பும் வன்மமும் உள்ளது. அவர்கள் மறைமுகமாய் இக்கலவரங்களை ஆதரிக்கிறார்கள். அதனால் தான் கலவரங்களை நடத்தி ஆயிரக்கணக்கானோர் சாக காரணமாய் இருந்தவர்களை ஓட்டளித்து பதவியில் அமர வைக்கிறார்கள். இந்த வன்மத்தின் அடிப்படையை களைவது பற்றி யோசிக்க வேண்டும். ஒரு கருத்தில் இருந்து தான் பெரும் குற்றங்கள் நிகழ்கின்றன. அக்கருத்தை வேரறுக்க வேண்டும். அத்வானிகளும் மோடிகளும் அக்கருத்தின் வெறும் புறவடிவங்கள். அவர்கள் இடத்தில் நாளை நூறு பேர் வருவார்கள்.