Thursday, June 23, 2016

நீயெல்லாம் ஒரு தாயா?

Image result for writer cartoon
பிளாகில் மட்டும் எழுதினால் பிளாகர், பேஸ்புக்கில் எழுதினால் பேஸ்புக் பதிவர், இதையே பத்திரிகையில் எழுதினால் ”எழுத்தாளர்”. எப்படி இந்த பட்டங்களை தீர்மானிக்கிறார்கள் என எனக்கு இன்று வரை புரியவில்லை.
 இப்படி எழுத்துக்களுக்கு தனி குணம், வகைமை உண்டென்றும் எனக்கு தோன்றவில்லை. சாரு எண்பதுகளின் இறுதியிலும் தொண்ணூறுகளின் துவக்கத்திலும் எழுதிய பத்திரிகை கட்டுரைகளை படியுங்கள். அவற்றில் இன்றுள்ள இணைய எழுத்தின் எள்ளலும் சரளமும் மிளிரும் ஸ்டைல் அப்போதே இருக்கும். நீளமாய் சீரியஸாய் பேஸ்புக், பிளாகில் எழுதுபவர்களும் இருக்கிறார்கள். பத்திரிகையில் அரட்டை மொழி பயன்படுத்துகிறவர்களும் உண்டு. எப்படி இவர்களை வகை பிரிக்கிறார்கள்?

முன்பு இலக்கிய பத்திரிகைகளில் நீளமாய் கடிதம் எழுதி பிரசுரிப்பவர்கள் இருந்தனர். இக்கடிதங்கள் சிலநேரம் மிகத்தரமாய் இருக்கும் என சாரு ஒருமுறை என்னிடம் குறிப்பிட்டார். குறிப்பாய் காலச்சுவடு இக்கடிதங்கள் மூலம் ஒரு தனி இயக்கமே நடத்தியது. இவர்கள் எழுத்தாளர்கள் இல்லையா? இன்று பேஸ்புக் பதிவுகளுக்கு நீளமான முக்கியமான அல்லது சர்ச்சையை தூண்டும் பின்னூட்டம் எழுதுகிறவர்கள் தனியே இருக்கிறார்கள். பத்து வரி பதிவு எழுதுபவர் பதிவர் எழுத்தாளர் என்றால் இருபது வரிக்கு பின்னூட்டம் இடுபவர் யார்? நோட்டு புத்தகத்தில் நிறைய எழுதி எதையுமே பிரசுரிக்காதவர்கள் எழுத்தாளர்களா இல்லையா?
எது இந்த எழுத்தாள அடையாளத்தை கொடுக்கிறது? தொடர்ந்து எழுதுவதா? அப்படி என்றால் வருடத்திற்கு ஒரு கதை எழுதுபவர் அல்லது பத்து வருடங்களுக்கு முன்பு ஒரு தொகுப்பு பிரசுரித்து விட்டு காணாமல் போனவர் எழுத்தாளர் இல்லையா?

சினிமாவில் இந்த சிக்கல் இல்லை. இயக்குநர் ராமை அவர் படம் எடுக்கும் முன்பே எனக்குத் தெரியும். அவர் தன்னை அப்போதே இயக்குநர் எனத் தான் அறிமுகப்படுத்திக் கொள்வார். ஒருவர் படம் எடுக்க நினைத்தாலே அவர் இயக்குநர் தான் என கூறுவார் அவர். ஆனால் எழுத்தில் இப்படி சுலபத்தில் கோர முடிவதில்லை. இசை, ஓவியம் போன்ற கலைகளுக்கும் இது பொருந்தும்.

ஒருவேளை இது வணிகமயமாகாத கலைகளில் சிக்கலாக இருக்கலாம். ஏனென்றால் பரவலான விற்பனைக்குரிய எந்த பண்டத்தை உற்பத்தி பண்ணக் கூடியவருக்கும் உடனடியாய் ஒரு அடையாளம் கிடைத்து விடுகிறது. இல்லாத போது அடையாளம் முழுக்க பார்வை சார்ந்ததாகிறது.

ஒரு பெண் எப்போது தாயாகிறாள்? கருத்தரித்த பின்னரா அல்லது முன்னரேவா? எந்த குழந்தையையும் அள்ளி கையிலெடுத்து நேசிக்கும் ஒருவள் தாயின் அந்தஸ்தை பெறுகிறாளா? பெற்ற பிள்ளையை வெறுக்கும் தாய் ஒருத்தி தாயா இல்லையா? நீயெல்லாம் ஒரு தாயா?, தகப்பனா? நீயெல்லாம் ஒரு நண்பனா? என்பதான கேள்விகளை நீங்கள் “நீயெல்லாம் இரு இயக்குநரா?” “நீயெல்லாம் ஒரு விற்பனை பிரதிநிதியா?” “நீயெல்லாம் ஒரு முதலாளியா?” என மாற்றி கேட்க முடியாது. 

No comments: