Friday, May 13, 2016

பத்மராஜன் படங்களின் பாணியில் ஒரு துப்பறியும் நாவல்


“கதை முடிவுக்கு வந்து விட்டீர்கள்” நாவலுக்கு விஜய மகேந்திரன் எழுதியுள்ள சுருக்கமான ஆனால் கூர்மையான மதிப்புரை. அவரது முகநூல் பக்கத்தில் இருந்து இங்கு மீள்பதிவு செய்கிறேன்:


நண்பர் அபிலாஷ் எழுதிய 'கதை முடிவுக்கு வந்துவிட்டீர்கள்' நாவல் நேற்று இரவு படித்து முடித்தேன். வாசிக்க சிக்கல் தராத நடை.பொதுவாக துப்பறியும் நாவல்களில் உள்ள செயற்கையான மர்மமுடிச்சுகள் இல்லை. ஒரு சிறுமியை பாலியல் பலாத்காரம் செய்து கொன்றவனை கண்டுபிடிப்பதுதான் நாவலின் ஒன் லைன். வேகமாக நாவலை விறுவிறு நடையில் அபிலாஷ் எழுதவில்லை என்பது பெரிய ஆறுதல். அடூர் கோபாலகிருஷ்ணன் மற்றும் பத்மராஜன் போன்ற இயக்குனர்கள் குற்றவகைப் படங்களை எடுத்தால் எவ்வாறு சீராக திரைக்கதை செல்லுமோ அப்படித்தான் இந்த நாவலும் நிதானத்துடன் நகர்கிறது.

குழந்தைகள் கடத்தல், பாலியல் பலாத்காரம் போன்ற விஷயங்களுக்கு எதிரான பிரச்சாரமாக அபிலாஷ் இந்த நாவலை எழுதவில்லை.மாறாக குழந்தைகள் மீது நிகழ்த்தப்படும் பாலியல் வன்முறைகளின் அடிப்படைகளை, குற்றங்களுக்கு பின் இருப்பவர்கள் எப்படிப்பட்டவர்கள் என காட்டிக்கொடுக்கிறார். நமது குழந்தைகளின் பாதுகாப்பு குறித்து ஆழ்ந்த கேள்விகளை எழுப்புகிறார். சட்டங்களின் ஓட்டைகளில் குற்றவாளிகள் தப்பிக்க முயல்வதையும் படம்பிடிக்கிறார். அபிலாஷின் மற்ற இரண்டு நாவல்களை விட இதில் உரையாடல்களில் அருமையான முன்னேற்றம் கண்டு இருக்கிறார்.இதை வெறும் துப்பறியும் வகை நாவல்களில் சேர்க்காமல் உரிய கவனத்துடன் படிக்க நண்பர்களுக்கு இந்த நாவலை சிபாரிசு செய்கிறேன். விரிவான கட்டுரை விரைவில் எழுதுவேன்.

கதை முடிவுக்கு வந்துவிட்டீர்கள்- ஆர்.அபிலாஷ்
உயிர்மை பதிப்பகம்
விலை 100ரூபாய்

No comments: