Tuesday, June 30, 2015

உடலைக் காப்பாற்றுவது எப்படி?


நம் உடலை நம்மிடம் இருந்து காப்பாற்றுவது பற்றி நிறைய டயட் டிப்ஸ், உடற்பயிற்சி அறிவுரைகள், உடல் எடை குறைக்கும் மருந்து பரிந்துரைகள் என விளையாட்டு பொம்மைகளால் சூழப்பட்ட குழந்தை போல ஆகி விட்டோம். வேறெந்த காலத்திலும் மனிதன் தன் ஆயுள், ஆரோக்கியம், உடல் தோற்றம் பற்றி இவ்வளவு அக்கறைப்பட்டிருப்பானா என்பது சந்தேகம். ஆனால் உடல் ஆரோக்கியம் என்பது இதற்கு எல்லாம் அப்பாற்பட்டதாக இருக்கிறது. தினசரி உடற்பயிற்சி செய்கிறவர்களுக்கும் நோய்கள், அது சம்மந்தமான வலிகள் வருகின்றன. யோகா மாஸ்டர்களும் கூட சின்ன உபாதைகளால் கடும் அவதிப்படுகிறார்கள். உடற்பயிற்சி, நல்ல உணவு, கட்டுப்பாடான வாழ்க்கை ஆகியவை நம் வாழ்க்கை தரத்தை மேம்படுத்தும் என்பது மட்டுமே இப்போதைக்கு உண்மை. உடல் வலுவாக, சுலபமாக, அலுப்பின்றி உணரும் போது ஒரு விடுதலை உணர்வு கிடைக்கும் அல்லவா அது தான் ஒரே பலன்.

Monday, June 29, 2015

கதையை கேட்பது

Image result for அசோகமித்திரன்

கதைகளை நாம் கண்களால் வாசிப்பது தான் வழக்கம். ஆங்கிலத்தில் ஒலி நூல்கள் பிரபலம். ஆனால் பழக்கம் காரணமாய் நான் எப்போதும் வாசிக்கவே பிரியப்பட்டிருக்கிறேன். முனைவர் பட்ட ஆய்வுக்கு சேர்ந்த பின் அங்குள்ள சக ஆய்வாளர்களான நண்பர்கள் அருள், டேவிட் ஆகியோர் குழுவாய் சேர்ந்து ஒரு கதையை வாசித்து கேட்கும் பழக்கத்தை அறிமுகப்படுத்தினார்கள். எல்லா வெள்ளிக்கழமையும் சில நண்பர்கள் சேர்ந்து மெரீனா கடற்கரையில் படைப்புகளை வாசித்து கேட்டு அது குறித்து கலந்துரையாடுகிறார்கள். இந்த குழுவுக்கு Men Friday என பேரிட்டிருக்கிறார்கள். பெரும்பாலும் ஆங்கிலத்துறை மாணவர்கள் என்பதால் ஆங்கிலப்பெயர் போல.

குடல் கிருமிகளால் ஆட்டுவிக்கப்படும் மனித மூளை


நியு யார்க் டைம்ஸில் ஒரு சுவாரஸ்யமான கட்டுரை படித்தேன். நம்முடைய குடலில் இருக்கும் கிருமிகள் நம் மனநிலையை, மூளையின் செயல்பாட்டை தீர்மானிக்க கூடும் என சில ஆய்வுகள் நிரூபித்து வருகின்றன. பேக்டீரியா சில நரம்பணு ரசாயனங்களை ரத்தம் வழி மூளைக்கு அனுப்பி தேவையான சமிஞைகளை உருவாக்கி நம் நடத்தையை தீர்மானிக்க முடியும். ஆட்டிஸம் போன்ற வியாதியால் பாதிக்கப்பட்டவர்களுக்கு குடலில் உள்ள கிருமிகளை மாற்றும் சிகிச்சை அளிப்பதன் மூலம் நல்ல முன்னேற்றம் கண்டுள்ளார்கள்.

Saturday, June 27, 2015

நன்மை மீதான கசப்பு


எதிர்பாராத நேரத்தில் அவசியமாய் வரும் உதவி எப்படி உணர வைக்கும்? மகிழ்ச்சியாய், நெகிழ்ச்சியாய், நிம்மதியாய் தோன்றும் எனத் தான் பொதுவாய் நம்புவோம். ஆனால் இல்லை.

Tuesday, June 23, 2015

எழுத்தும் திருமணமும்


ஒரு தோழியிடம் பேசிக் கொண்டிருந்தேன். கல்யாணம் ஆன எழுத்தாளர்களின் புனைவுகளையே விரும்பிப் படிப்பதாய் சொன்னார். நன்றாய் எழுதுவதற்கு திருமண வாழ்வு அவசியம் என்றொரு லாஜிக்கை வைத்தார். நான் திருமணமான பின் தான் எழுத்தில் சவால்கள் மிகவும் அதிகரிப்பதாய் சொன்னேன். வாழ்க்கைத்துணைகள் எப்போதும் ஒருவர் எழுத்து, இசை போன்ற கலை அனுபவங்களில் மூழ்கித் தொலைவதை விரும்புவதில்லை. அவர்கள் அதனால் நீங்கள் அக்கலையை பயிலும் போது முடிந்தவரை தொந்தரவு பண்ணுவார்கள்.

Friday, June 19, 2015

ஜெ.பி. சாணக்யாவின் “பூதக்கண்ணாடி”

Image result for ஜெ.பி சாணக்யா

ஜெ.பி சாணக்யாவின்பூதக்கண்ணாடிதமிழில் எழுதப்பட்ட மிகச்சிறந்த சிறுகதைகளில் ஒன்றாய இருக்கலாம். அதன் விரிவைப் பார்க்கையில் ஒரு குறுநாவலின் சின்ன விதை போலத் தோன்றுகிறது. அதன் சிறப்பு ஒரு மனநிலையை மெல்ல மெல்ல மீட்டி பிரம்மாண்டமாய் ஒரு தாக்கத்தை ஏற்படுத்துவது தான்

வங்கதேசமும் மழை அளிக்கும் சுதந்திரமும்



வங்கதேசத்தோடான முதல் ஒருநாள் ஆட்டத்தில் இந்தியாவின் மோசமான தோல்வி நமது அசட்டையான அணுகுமுறையின் விளைவு தான். இது அனைவருக்கும் புரிந்திருக்கும். மற்றொரு காரணம் உண்டு. அது மழை.

Sunday, June 14, 2015

தமிழ்த் திரையிசைப் பாடல்களில் கவித்துவம் (2) – வைரமுத்து

Image result for வைரமுத்து
(www.inmmai.comஇல் எழுதி வரும் தொடரின் ஒரு பகுதி)

கண்ணதாசனுக்கு பிறகு தோன்றியவர்களில் மிக வளமான கற்பனையும் மரபுடன் ஆழமான தொடர்பும் கொண்ட பாடலாசிரியர் வைரமுத்து தான். “வானம்பாடி” இயக்க கவிஞர்களிலும் கட்டற்ற கற்பனை வளம் கொண்ட ஒரே எழுத்தாளர் அவர் தான். அதனாலே இன்றும் மு.மேத்தா, தமிழன்பன் ஆகியோரின் கவிதைகளை வைரமுத்துவின் வரிகள் அருகே வைத்துப் பார்கையில் அவை ஒளியிழந்து வயதான நடிகையின் சருமம் போல் தோன்றுகின்றன.

Friday, June 12, 2015

பா.ஜ.கவின் மலைப்பாம்பு அரசியல்


மலைப்பாம்பு இரையை மெல்ல நெருங்கி தன் உடலால் சுற்றி வளைத்து இறுக்கும். நெருக்கி எலும்புகளை கூழாக்கும். இரை செயலிழந்த பின் அதை முழுதுமாய் முழுங்கி விட்டு ஜீரணமாகும் வரை பல மணிநேரங்கள் அசையாது படுத்துக் கிடக்கும். மெதுவான வலிமிகுந்த மரணம். இதற்கு இரை மீது பாய்ந்து கழுத்தைக் கடித்து உயிரெடுக்கும் சிங்கம், புலிகள் மேல். பா.ஜ.க ஆட்சிக்கு வந்த பின் இந்த மலைப்பாம்பை போலத் தான் நடந்து கொள்கிறது. நாடாளுமன்ற தேர்தலுக்கு பிறகு அது தில்லி மற்றும் உ.பியில் அடிவாங்கியது. உ.பி தேர்தலுக்கு சில மாதங்களுக்கு முன் அங்கு நிகழ்ந்த சில கற்பழிப்பு வழக்குகளை பெரிதுபடுத்தி மீடியா மூலமாய் அகிலேஷ் யாதவை தாக்கியது. அதே போல் அங்கு மதக் கலவரங்களையும் விளைவிக்க முயன்றது. அதாவது மத உணர்வுகளை ஒரு புறம் தூண்டி, ஆளுங்கட்சியின் சட்டம் ஒழுங்கு பற்றி மோசமான சித்திரத்தை உருவாக்கி தேர்தலில் வெல்ல முயன்றது. ஆனால் இம்முயற்சி மண்ணைக் கவ்வியது.

Tuesday, June 9, 2015

கல்வி கோழிப்பண்ணைகள்


தனியார் பள்ளிகளின் முறைகேடான கட்டண வசூலை கண்டித்து SFI உள்ளிட்ட மாணவர் அமைப்புகள் இன்று தமிழகத்தின் பல இடங்களில் நடத்தி உள்ள போராட்டங்கள் வரவேற்கத்தக்கவை. அடுத்த கட்டமாய் இத்தனியார் பள்ளிகளில் சேரும் மாணவர்களின் பெற்றோர்களை சந்தித்து அவர்களிடம் உரையாடி உண்மையை புரிய வைக்க வேண்டும். அதிகப்படியான கட்டணம் செலுத்துவது ஒருவித சமூக அநீதி எனும் உணர்வை அவர்களுக்கு ஏற்படுத்தினாலே இப்போராட்டம் பெரும் வெற்றியை அடைந்து விடும். கல்விக் கோழிப்பண்ணைகள் ஐ.ஐ.டியை விட ஆபத்தானவை.

Friday, June 5, 2015

கார்த்திக் நேத்தாவின் திரைப்பாடல்கள்


தமிழில் நவீன கவிதை என்றும் அருகிப் போன மூலிகை போன்ற வஸ்து தான். ஆனால் அதன் வீச்சை இன்று விகடனில் வரும் கவிதைகளில் இருந்து திரைப்படப் பாடல்கள் வரை பார்க்க முடிகிறது. குறிப்பாய் சமகாலப் பாடல்களில் வரும் உவமைகளைச் சொல்லலாம். எழுபது எண்பதுகளில் கவிதையில் உருவகம் பிரதானமாய் இருந்தது. மு.மேத்தாவின் “நெம்புகோல் கவிதை” ஒரு உதாரணம். பிறகு தொண்ணூறுகளில் குறியீடு மற்றும் படிமம். “நடக்கும் இடமெங்கும் பொன்மணல்” எனும் பிரமிள் வரியைச் சொல்லலாம். இப்போது கவிதையின் அச்சாணியாக உவமை இருக்கிறது. நேரடியான, கதைகூறும் பாணியிலான எளிய கவிதை தான் இன்றைய பாணி. நேரடியான கவிதையில் உக்கிரமான உணர்ச்சியை சொல்வதற்கும், அதை எளிமையாக வைப்பதற்கும் உவமை ஏற்றது. சமீப காலத்தில் நினைக்கும் போதெல்லாம் என்னை உலுக்க வைக்கும் உவமை இது.
“வாய்க்குள் உலகத்தை
அடக்கிய கண்ணனைப் போல
உள்ளங்கைக்குள் அடக்குகிறேன்
உன் குறியை” (மனுஷி, “குட்டி இளவரசியின் ஒளிச்சொற்கள்”)

Tuesday, June 2, 2015

இன்றைய ஞாயிறு

the last day by mikeshkaos

காலை எழுந்ததும்
இது ஒரு ஞாயிற்றுக்கிழமை
என நம்பத் தொடங்குகிறேன்
சோம்பல் முறித்து
கண்ணோர பீளையை துடைத்து
தடுமாறியபடி நடந்து
கழிப்பறை போகிறேன்
மூத்திரம் போகையில்
துண்டுத் துண்டுக் கனவுகள்
முட்டைகளை உடைத்து பாத்திரத்தில் ஊற்றியது போல்
ஒவ்வொன்றாய்…

ராஜன் குறையின் மனப்பாங்கு

இம்மாத காலச்சுவடில் வெளியாகி உள்ள ஸ்டாலின் ராஜாங்கத்தின் ”திராவிட இயக்கமும் தலித் விடுதலையும் எனும் கட்டுரை பற்றி ராஜன் குறை இவ்வாறு சொல்கிறார்: “இன்னமும் எங்கோ ஒரு சீற்றம் திராவிட இயக்கத்தின்மீது உள்ளோட்டமாக வெளிப்படுவதை உணரமுடிகிறது. சம்வாதத் தொனியை தாண்டி (polemical stance) ஆய்வாக மாறுவதற்கு அந்த சீற்றத்தை தவிர்த்து திராவிட இயக்கத்தின் நேர்மறையான பங்களிப்புகளை தொகுத்துக்கொள்ள வேண்டும். அப்போதுதான் அவர் வைக்கும் நுட்பமான விமர்சனங்கள் வலுப்பெறும் என்று நம்புகிறேன். இல்லாவிட்டால் வெகு சுலபமாக பார்ப்பன ஆதரவாக சுருக்கப்பட்டுவிடும்

ஸ்டாலின் ராஜாங்கத்தின் அக்கட்டுரையை படித்தேன். அது தலித் அரசியல் மற்றும் திமுக மீது வைக்கும் விமர்சனங்கள் நியாயமானவை. தர்க்கரீதியிலும் அக்கட்டுரையில் சிக்கல் இல்லை. ”  பெரியார் காலத்திலிருந்தே திராவிடர் கழகத்திற்குத் தாழ்த்தப்பட்டோர் விசயத்தில் வரையறைகள் இருந்தன. அடிப்படையில் திராவிடர் கழகம் தாழ்த்தப்பட்டோருக்கு எதிரான இயக்கம் கிடையாது. பிராமண எதிர்ப்பில் நியாயமே இல்லை என்று கூறமுடியாது. ஆனால் அதன் முதன்மை நோக்கோ, நிகழ்ச்சி நிரலோ தாழ்த்தப்பட்டோருக்கானதாய் இல்லை. அக்கட்சியின் பிராமண எதிர்ப்புக் கருத்து தலித்துகளுக்கும் அரசியல்ரீதியாக உதவியது என்பதைத் தாண்டி மற்றபடி அதில் சொல்வதற்கு ஏதுமில்லை. பெரியார் காலத்திலேயே அது பிரதிநிதித்துவப்படுத்திய சூத்திரர்களின் ஆதிக்கத்திற்கும் வன்முறைகளுக்கும் எதிராக தலித்துகள் தனித்துதான் போராடி வந்தனர். தலித்துகளுக்குத் தனி அமைப்புகள் இருந்தன. சில இடங்களில் கம்யூனிஸ்ட் இயக்கங்களில் உழைக்கும் தொழிலாளர்களாகத் திரண்டிருந்தனர். வேறு தளங்களில் தாங்கள் புரிந்து கொண்ட கருத்தியலுக்கு ஏற்ப காந்திய இயக்கத் தினரும் செயற்பட்டனர்.” என ஸ்டாலின் எழுதுவது வரலாற்று உண்மைகள். ஆனால் ஸ்டாலின் மீதான இக்கட்டுரையில் கருத்து சமநிலை இல்லை என்கிறார் ராஜன் குறை. கருத்து சமநிலைக்காக அவர் தனியாக ஒரு பத்தி திமுகவின் தலித் பங்களிப்பு, அதிமுகவின் தலித் பங்களிப்பு என எழுத வேண்டுமா? கடந்த ஐந்தாண்டுகளில் கணிசமான தலித்துகள் ப.ஜ.க, ஆர்.எஸ்.எஸ்ஸிலும் சேர்ந்துள்ளனர். அதற்காய் அக்கட்சிகளின் தலித் பரிமாணத்தைப் பற்றியும் எழுத வேண்டுமா? என்ன அபத்தம்! ஒரு எழுத்தாளன் தான் எடுக்கிற ஒரு நிலைப்பாட்டில் நம்புவதால் தான் அவன் அது பற்றி எழுதத் தலைப்படுகிறான். அதற்கான நியாயங்களை வகுக்கிறான். அனைத்து தரப்புகளுக்குமான தரவுகளை தொகுத்தளிப்பது அல்ல அவன் வேலை. தன் நியாயத்தை, நம்பிக்கையை பேசுவதே அவன் பணி. எனக்கு இந்த விமர்சனம் ராஜன்குறையின் மனநிலையைப் பற்றி மூன்று விசயங்களை காட்டுகின்றன.

1)    2014 ஜனவரி மாதம் காட்சிப்பிழையில் வெளியான ஸ்டாலின் ராஜாங்கத்தின் முக்கியமான கட்டுரை ஒன்று வெட்டி சுருக்கப்பட்டு வெளியானது. நான் கடந்த ஏழு வருடங்களாய் சிறு மற்றும் நடுநிலை பத்திரிகைளில் தொடர்ந்து எழுதி வருகிறேன். ஆனால் என்னுடைய ஒரு கட்டுரை கூட வெட்டப்பட்டதில்லை. வணிக பத்திரிகைகளில் தான் நீளம் கருதி வெட்டுவார்கள். ஆனால் நடுநிலை மற்றும் சிறுபத்திரிகைகளில் கட்டுரையின் தரமும் ஆழமும் தான் முக்கியம், நீளம் அல்ல. இடம் போதவில்லை என்றால் வேறொரு தகுதி குறைவான கட்டுரையை அடுத்த இதழுக்கு என வெளியே வைத்து விட்டு பெரிய கட்டுரையை அவ்விடத்தில் போடுவார்கள். ஆக எனக்கு இது ஒரு அரசியல் நகர்வு என அப்போதே பட்டது. ராஜன் குறை அப்பத்திரிகையின் மீது கணிசமான செல்வாக்கு செலுத்துபவர். இப்போது அவர் ஸ்டாலினை விமர்சிப்பது பார்த்தால் இரண்டுக்கும் தொடர்பு உள்ளதோ என ஐயம் எழுகிறது. என்னிடம் ஆதாரம் ஏதும் இல்லை. ஊகம் மட்டுமே. புதிதாய் கவனம் பெற்று வரும் திறமையாளர்களைப் பார்த்து “நன்னா பாடறே, ஆனா ஸ்ருதி சுத்தம் இல்லே. பார்த்துக்கோ என மணடையில் தட்டுவது அவரது ஸ்டைல். ‘ஸ்டாலின் நல்லா எழுதறீங்க. ஆனா இதெல்லாம் போதாது என்பதன் பொருளும் இது தான். இது தீவிர வாசகர்களை ஈர்க்கிற எழுத்து பாணியும், புதிதாய் சிந்திக்கிற திறமையும் கொண்ட எழுத்தாளர்கள் தோன்றும் போது அவர்கள் மீது ராஜன் குறை கொள்ளும் பதற்றத்தின் வெளிப்பாடு என நான் பார்க்கிறேன்.

2)    காட்சிப்பிழை நடத்தின கருத்தரங்கில் நான் தமிழ் சினிமாவில் புரோமேன்ஸ் பற்றி பேசினேன். அது முடிந்ததும் ராஜன் குறை என்னிடம் வந்து கட்டுரை சிறப்பு, ஆனால் தரவுகளை அடுக்கி விட்டு அதன் மீது என் அவதானிப்புகளை வைக்கக் கூடாது என அறிவுரைத்தார். இது ராஜன் குறையின் அடுத்த பிரச்சனை. அவர் இங்கு ஸ்டாலின் ராஜாங்கத்துக்கு வலியுறுத்துவதும் இது தான். இது ஆய்வுக்கட்டுரைகளின் முறைமை. ஆய்வுக்கட்டுரையாளர்கள் பொதுவாய் ஒரு பிரச்சனையை எடுத்து ஒரு கருத்தியல் சட்டகத்தின் மீது ஒரு மீது இட்லித்தட்டில் மாவை ஊற்றுவது போல வைப்பார்கள். அது வெந்ததும் இறக்கி வைப்பார்கள். அதில் புது சிந்தனைகளோ பார்வையோ இராது. எழுத்தாளனின் மனநிலை, உணர்ச்சி சார்பு வெளிப்படாது. இப்படித் தான் எழுத வேண்டும் என அவர் நினைக்கிறார். ஆனால் உண்மையில் ஒரு எழுத்தாளன் இப்படி எழுதக் கூடாது. வலை போல் ஒரு கருத்தியலை பின்னிப் பின்னி வைப்பது தான் ராஜன் குறையின் எழுத்து முறைமையும். அவருடைய எழுத்தில் ஒரு சொந்தக் கண்டுபிடிப்பு எதுவும் இருக்காது. கருத்தியலும் தர்க்கமும் சரியாய் உள்ளதா என்பதில் அவர் முழு கவனமும் இருக்கும். அது தான் அவரது பலவீனம். இது போன்ற எழுத்தை ஒரு கல்வித்துறை கருத்தரங்கில் சமர்ப்பித்து டி.ஏ, டி.ஏ வாங்கி, வேலை உயர்வுக்காய் சி.வியில் சேர்க்கலாமே ஒழிய எழுத்துலகில் இதற்கு எந்த மதிப்பும் இல்லை. ஏனென்றால் இதில் எந்த புது அவதானிப்புகளோ இல்லை. வாசகர்கள் எபோதும் புது அவதானிப்புகள் கொண்ட, துணிச்சலான பார்வை கொண்ட எழுத்தையே விரும்புகிறார்கள். ஆனால் அத்தகைய எழுத்து ராஜன் குறையை பதற்றப்படுத்துகிறது. அபிஷ்டு அபிஷ்டு என சொல்லிக் கொண்டே இருக்கிறார். எழுத்தாளனுக்கு தற்சார்பு அவசியம். ஸ்டாலின் ராஜாங்கத்தின் எழுத்திலுள்ள தற்சார்பைத் தான் அவர் கண்டிக்கிறார். ஆனால் தற்சார்பு தான் எழுத்துக்கு ஒரு வெளிச்சத்தையும் நிறத்தையும் அடையாளத்தையும் அளிக்கிறது. ஆழத்தையும் தீவிரத்தையும் கொடுக்கிறது. இலக்கிய எழுத்து தற்சார்பு கொண்டது. கல்வியாளரின் எழுத்து எந்த சார்பும், எந்த நிலைப்பாடும் அற்றது. அது வார்க்கப்பட்ட ஒரு காங்கிரீட் துண்டைப் போன்றது. இலக்கியவாசகன் அத்தகைய காங்க்ரீட் துண்டுகளை நிராகரித்து விடுவான். இதை நான் மட்டும் சொல்லவில்லை. ஆஷிஸ் நந்தியின் முழுக்கட்டுரைகளின் தொகுதியான A Very Popular Exileஇன் முன்னுரையில் இமிதியாஸ் அகமது சொல்வதும் தான். ராஜன் குறை பரிந்துரைக்கும் எழுத்துமுறை எந்த சார்போ அவதானிப்போ அற்ற தரவுகளை அடுக்கி விட்டு பின்னகர்ந்து கைகட்டி நிற்கும் ஒன்று. அது கல்வியலாளனுக்கானது; எழுத்தாளனுக்கானது அல்ல. ஸ்டாலின் ராஜாங்கம் எழுதியுள்ளது ஒரு கல்வியாளக் கட்டுரை அல்ல. அது நடுநிலை இலக்கியப்பத்திரிகையான காலச்சுவடில் வெளியாகியுள்ள ஒரு எழுத்தாளக் கட்டுரை. அக்கட்டுரையை ஏன் ஒரு கல்வியாள அச்சுக்குக்குள் ராஜன் குறை திணிக்கப் பார்க்கிறார்? 

3)    ஒருமுறை ஜெயமோகன் பற்றி ராஜன் குறையிடம் பேசும் போது அவரிடம் வெளிப்பட்ட கோபமும் கொந்தளிப்பும் என்னை வியப்பில் ஆழ்த்தின. ஜெயமோகன் தத்துவத்தை சரியாய் படிக்காமல் குளறுபடியாய் எழுதுகிறார் என பொங்கினார். ஆனால் அவரது கண்டனம் எனக்கு மிகையாகப்பட்டது. எழுத்தாளனின் கருத்துநிலையில் உள்ள புதுமை, அதன் ஆழம், புதுத்தாவல் என்பதை கவனிப்பதை விட, ஒரு அளவுகோல் வைத்து அவனது கருத்துக்களின் கல்வியல் சரித்தன்மையை சரிபார்ப்பதே அவரது அக்கறையாய் உள்ளது. ஜெயமோகன் தத்துவவாதி அல்ல. அவர் தத்துவத்தை கராறாய் கற்று குறையின்றி தொகுக்க வேண்டியதில்லை. தத்துவத்தில் இருந்து ஒரு கருத்தை எடுத்து அதை தன் பார்வையில் விரிவுபடுத்துவதே எழுத்தாளனின் நோக்கம். ராஜன் குறை ஏன் சட்டதிட்டங்கள், விதிமுறைகள், சரித்தன்மை, சமநிலை பற்றியெல்லாம் இவ்வளவு அக்கறைப்படுகிறார்? ஏன் இப்படி உடைவு, சிதைவு, குழப்பம், சீரற்ற பார்வை பற்றியெல்லாம் இவ்வளவு அச்சப்படுகிறார்? இது ஒருவித பிராமணியமா?


4)  தொண்ணூறுகளின் துவக்கத்தில் கூகிள் இல்லாததால் மேற்கத்திய கருத்தியலை மொழியாக்கி அல்லது தமிழில் சுட்டு அளிப்பவர்களுக்கு ஒரு மதிப்பு இருந்தது. இன்று கூகிள் அவர்களின் இடத்தை பிடித்துக் கொண்டது.இன்று சொந்தமாய் எழுதுகிறவன் தான் எழுத்தாளன். ஏற்கனவே உள்ள கருத்தியல்களின், தரவுகளின் மாவை பிசைந்து உருவம் கொடுப்பவன் அல்ல.  ராஜன் குறை நீங்கள் எனக்கு மகாபாரத போர் முடிந்த பிறகான திருதராஷ்டிரனை நினைவுபடுத்துகிறீர்கள்.
ஸ்டாலின் ராஜாங்கம் திமுகவை விமர்சிப்பது இறுதியில் பிராமணியத்தை ஆதரிப்பதாய் போய் முடியும் என எச்சரிக்கிறீர்கள். என்ன மாதிரியான தர்க்கம் இது? தன்னை நிராகரித்த பெண்ணை நோக்கி “மிக மோசமான கணவன் உனக்கு அமையட்டும்” என ஒரு ஆண் சபிப்பதை போன்ற தர்க்கம் இது. எந்த பெண்ணுக்கும் அப்படி நடப்பதில்லை.

Monday, June 1, 2015

ஜெயகாந்தனின் மறுகட்டமைப்பும் தீவிர இலக்கியவாதிகளும்

Image result for ஜெயகாந்தன்
(மே 2015 அம்ருதாவில் வெளியான கட்டுரை)

ஜெயகாந்தனின் மறைவை ஒட்டி எழுதிக் குவிக்கப்படும் புகழஞ்சலிகளும் பேசப்படும் மிகையான பேச்சுகளுக்கும் அவர் நிச்சயம் தகுதியானவர் தான். தமிழின் இறுதி பொது ”அறிவுஜீவி” அவர். அறிவுஜீவியை மேற்கோட்குறிகளுக்குள் போடக் காரணம் எந்த அறிவுத்துறையிலும் பயிற்சியற்ற இயல்பறிவு ஜீவி (common sense intellectual) அவர் என்பது.