Tuesday, December 29, 2015

மாதொரு பாகனை பதிப்பித்தவர் யார்?



நேற்றிரவு சன் நியூஸ் விவாத மேடை நிகழ்ச்சியில் ஒரு வேடிக்கையான விசயம் நடந்தது. இந்து முன்னணியின் ராஜேஷ் என்பவர் தொடர்ந்து “மாதொரு பாகன்” நாவல் பெண்களை மிகவும் ஆபாசமாய் சித்தரித்த நாவல் என கதறிக் கதறி திட்டிக் கொண்டிருந்தார். நிகழ்ச்சியின் முடிவில் நான் அவரிடம் ஒரு கேள்வி கேட்டேன் “மாதொரு பாகன் நாவலின் பதிப்பாளர் யார்?”. அவர் சற்றும் கூச்சமில்லாமல் “எனக்குத் தெரியாது” என்றார். “நீங்கள் படிக்காத நாவல் பெண்களை கொச்சைப்படுத்துகிறது என எப்படி அபாண்டமாய் பழி சுமத்தலாம்?” எனக் கேட்டேன். அவர் உடனே மிகுந்த தன்னம்பிக்கையுடன் “அதெல்லாம் படிக்க வேண்டிய அவசியம் இல்லை. அது பெண்களை இழிவு படுத்தும் மிக கேவலமான நாவல்” என உச்சஸ்தாயில் கத்த துவங்கினார்.

 எப்படித் தான் படிக்காத நாவல் பற்றி ஒரு நிலைப்பாட்டுக்கு அவர் வந்து சேர்கிறார் என நான் மீண்டும் மீண்டும் கேட்டேன். அவர் திருதிருவென விழித்தார். அடுத்து “சிம்புவும் இப்படித் தாங்க பீப் பாடல்னு ஒண்ணு” என்று சினிமா சர்ச்சைக்கு தாவினார்.
 சல்மான் ரஷ்டி, தஸ்லிமா நஸ்ரின், (நக்கீரனில் எழுதின கட்டுரைக்காக) மனுஷ்யபுத்திரன், ஹெச்.ஜி ரசூல் ஆகியோர் வலதுசாரிகளால் வேட்டையாடப்பட்ட போதும் அவர்கள் யாருமே எழுதப்பட்ட படைப்பை படித்திருக்கவில்லை தான். தாம் எதுவும் படிக்காமல் கூச்சலிடுகிறோம் என அம்பலம் ஆவதிலும் இவர்களும் எந்த அவமானமும் இல்லை. கடவுள் இவர்களை ஒரு வித்தியாசமான டிஸைனில் படைத்திருக்கிறார். ஆனால் பத்திரிகையாளர்கள் மற்றும் மீடியா நண்பர்களிடம் வைக்கும் கோரிக்கை என்னவென்றால் அடுத்த முறை ஒரு படைப்பு சர்ச்சைக்கு உள்ளாகும் போது அதை கண்டிக்கிறவர்களிடம் புத்தகம் பற்றின அடிப்படையான கேள்விகளைக் கேளுங்கள் (பதிப்பாளர் யார், பிரதான பாத்திரங்கள் யாரெல்லாம், கதைக்களம், கதை என்ன, சர்ச்சைக்குரிய பத்தி கதையில் எந்த இடத்தில் வருகிறது போன்று). அவர்கள் படிக்கவில்லை என்பதை அம்பலப்படுத்துங்கள். கோமாளிகளின் முகத்திரையை கிழிக்க வேறு வழியில்லை. 

No comments: