Sunday, October 19, 2014

தீபாவளியும் அமேசானும்


தீபாவளி தள்ளுபடி விற்பனையை ஒட்டி தன்னால் கையாள முடியவில்லை என பிளிப்கார்ட் வாடிக்கையாளர்களிடம் மின்னஞ்சலில் மன்னிப்பு கேட்டது. ஆனால் ஆர்டர் செய்தவர்களுக்கு பொருளை ஒழுங்காக நேரத்தை அனுப்பியது. உண்மையில் அவர்களை விட மோசமாய் சொதப்பியது அமேசான் தான். தீபாவளியை ஒட்டி வந்த ஏகப்பட்ட ஆர்டர்களை அவர்களால் சரியாக கொரியர் பண்ண முடியவில்லை. அமேசானின் பேஸ்புக் பக்கம் புகார்களால் நிரம்பி வழிகிறது. தீபாவளியினால் பணியாளர்கள் விடுமுறையில் போவதும் ஒரு காரணமாக இருக்கலாம். ஆனால் அதை விட அமேசானுக்கு தனது கொரியர் நிறுவனம் எப்படி எந்நேரம் பொருட்களை கொண்டு சேர்க்கிறது என்பது பற்றி போதுமான தகவல் இல்லை என்பது தான் சிக்கல். கொரியர் ஆட்கள் வாடிக்கையாளர்களுக்கு சரியான தகவல் தருவதோ தொடர்பில் இருப்பதோ இல்லை. வாடிக்கையாளர் சேவை தொடர்பாளரை அழைத்தால் உடனே மன்னிப்பு கேட்டு உறுதி அளிப்பார்கள். தினமும் கூப்பிட்டாலும் இதோ புலி வரும் புலி வரும் என்பார்கள். ஆனால் வராது.

இந்த கண்ணாமூச்சி விளையாட்டினால் அமேசானின் பெயர் ரொம்பவே கெட்டுவிட்டது. தீபாவளி முடிந்து தான் பலருக்கும் பொருட்கள் வந்து சேரும் போல. தீபாவளிக்கு பரிசு ஆர்டர் பண்ணினவர்கள் தாம் பாவம். நானும் அமேசானில் ஆர்டர் பண்ணின ஒரு பொருள் வந்து சேரவில்லை. அமேசானிடம் புகார் அளித்து, வாடிக்கையாளர் சேவை தொடர்பாளர்களிடம் பேசு பேசி அலுத்து விட்டது. நம்மூரில் ஒரு மழை பெய்தால் டிரான்ஸ்பார்மர் வெடிக்கிறது. சாலைகளில் மக்கள் காலை வைத்தால் உள்ளிழுத்துக் கொள்கிறது. வீடுகளுக்குள் சேற்று வெள்ளம் ஓடுகிறது. வண்டிகளுக்குள் நீர் புகுந்து நின்று போகின்றன. மின்சாரத்தை நிறுத்தி வைக்கிறார்கள். எங்கள் வீட்டில் மின் இணைப்புகள் பழையன என்பதால் அடிக்கடி ஏதாவது ஒரு விளக்கோ ஒயரோ நமுத்த பட்டாசு போல் வெடிக்கிறது. நாளை மாலை தீபாவளிக்காக ஏராளமான மக்கள் சென்னையை காலி பண்ணப் போவதால் போக்குவரத்துக்கு மலச்சிக்கல் வந்து யாரும் நகர முடியதபடி ஆகும் என்கிறார்கள். அதனால் நாளை சீக்கிரமாக வீட்டுவருவது நல்லது என அறிவுரை சொல்கிறார்கள். உண்மையில் ஒரு பண்டிகை விழா என்றால் கொண்டாட்ட மனநிலை வர வேண்டும். மழை என்றால் சிலாகிக்க வேண்டும். ஆனால் இங்கு நாம் என்ன ஆபத்தெல்லாம் சந்திக்க போகிறோமோ என கவலைப்பட வேண்டி இருக்கிறது. இங்கு கொண்டாட்ட தினங்களில் ஒரு பதற்ற நிலை தான் ஏற்படுகிறது. அவசரமாய் எப்படியாவது மகிழ்ச்சியை, உற்சாகத்தை ஒரு கவளை முழுங்கி ஒரு வாய் தண்ணீர் குடித்து விடுவோம் என பதறுகிறோம். பண்டிகை தினங்களில் உருவாகும் மிகப்பெரும் மக்கள் இடப்பெயர்வை சமாளிக்கும் கட்டமைப்பு திறன் நம் நாட்டுக்கு இல்லை. இத்தினங்களில் பயணிக்கிறவர்கள் உண்மையில் ரொம்ப பாவம். நாளைய தினம் எத்தனை பேர் கோயம்பேட்டி மூச்சுத்திணறப் போகிறார்களோ!


பண்டிகை என்றால் எந்த சேவையும் இயங்காது. அமேசானை மட்டும் குற்றம் சொல்லி என்ன ஆகப் போகிறது. பழகிப் போச்சு. எல்லா இடர்களையும் மறந்து கொண்டாட கற்றுக் கொண்டு விட்டோம். மழையும், பண்டிகையும், பந்தும், கொண்டாட்டங்களும், விநாயகர் சதுர்த்தி ஊர்வலங்களும் இல்லாத போது தான் நம் ஊர் இயல்பாக சரியாக இருக்கிறது. தீபாவளிக்கு பட்டாசு வெடித்தால் நாய்கள் எங்காவது போய் ஒரு வாரத்துக்கு ஒளிந்து கொள்ளும். நாமும் ஒளிந்து கொள்ள வேண்டியது தான். ஒளிந்திருந்தபடி கொண்டாட வேண்டியது தான். 

1 comment:

krish said...

அழகாக சொல்லிவிட்டீர்கள்.